Dina ma u piye dey junavbi. Pi vatene: "Uşe zu keke mino, zu lazeke mino." Uşe roşta ma û pî, adire lozinge, koke dara dinu bi. Uşe jara dinu xavene dinu bi. Yine vatene, lazeke ma je ma nevo, zexmetena ma, hesreta ma, bındestena ma meonco. Zmane ma ki memiso. Na zmane Kırmanciye çiko? Kirmanciya beleke! Zmane(zon) efendi u devlemendu bimuso, zmane Elmanu, İngilizu. Zmane Kirmanciye dinere dert ardvi, tersenen ardvi; eskeriyede pî re, dibistanone Tırkande dakile re copol u paskul ardvi. Lazek çira na zman bimiso, çira bine derde Kirmanciye de bimano? Dakile vatene: "Ya ya lazeke mi zmane Tırkan u Elmanu bimuso."

            Uşen dibistane Elmanu peyderpey qedenay. Gymnasiume Elmanu zaf rehet wend û şi universite. Senik mendvi ke ey ki biqedeno. Endi xebetina xo, perey u rehetiya xo dür nebiye. Nejdide her çiye Uşen temam biyene. Linga ma u pi nekuyenara hard, ti vane biye mirçike perene. Sare pi je koyene Kurdan berz bi. Vatene: "Her çiye Uşen'e mi esto, le eke wayire koyene ma ke destra bijero, zu çeneka sithelal ma bivenime, çime mi peyde nemanene."

            A sere pöro piya şi welat. Ma u pi zu çim, zu dil wasteneke dewa xo biwene, le Uşen welate pi ye xo hona nediwi. Welate pi çutiriyo, meraxe dey her roz biyene girs. Welate ma u pi! Yine vatene ma qome xo weneme, halhatır perskeme, derdone dinu gosdame, xaletu keme vila, dima ki lazeke xore, roşta çimane xore çeneka rindeke wazeme. Coka Uşen tey berdvi.

            Hire çar roj ra tepayvi, eskere Tırkan ame dewe. Ti vana deleverge kote gore, ti vana dina ra niye züvna astorare ame, goşte insan wene. Uşen niyada ke dane cenure, kokumure, domoneru. Ey niyadake dakile bine postalone eskerdera. Ey şerkerd ke çutir bono riznene, na bone pi u kal, na bone ke eve hazar derd u zexmet ame viraştiye.

            Uşen hend zonake hewndero, hewno xiravindero. Uşe cemediya, bi dar, bi kemer, bi husk mend. Gulera weng newejiya, çim je cam niyada ke dewera adir beno berz. Bone ape xo ard were çimane xo, bone ke tede kotvira, xoncika ke sero nan werdvi, ostero ke wijer niştverozu dorme dewe de ramitvi, manga, miye, bıza ke ey dest nayvi pa; pöro adirdere. Dewera dumano şa beno berz. Xo ve xo vat: "Ya ya dewa piye mi wesena, welat horte adirdero.

            Alem zaneno ke zere ceneno Kurd male xo ser zaf teniko. Ye daymisnebene mala xo u male xo biwesiyo. Yine xo est adir ser u cira mal biweze. Uşe niyadake esker yine ki erzeno adir. Dar weseno, bır weseno, cenik wesene, adir kerdo Kirmanciye, welat weseno.

            Esker; kay û wayiş ra gowend ra, lavik ra dewe ra wejay, le peye xo de tertele caverda. Boya goşt biye berz kote horte dumane şa û je zengil dewe sere vinete. Dewe ra şivan u ax bi berz. Qom nezonake sebikero. Were ma zimistano, lo bira ma sebikerime? Wesêye dinu ki merdvi, keşte ro çinebi, dina dey riznaybi.

            Uşe ki dirvetin bi, xo ser nebi. Resme dewe were çimane deyra neşiyene. Ey üniversita Elmanu caverda, cadeye pak, duzena ke je seate xebetina, kar, perey caverday. Ey germêna dakila xo, evina daye û roşta piye xo ji caverday. Hevalone xora ji bi dür. O baqil vi, zaf kitav wend, çira welate bakil weseno? Uşen wend je mordeme wesan û tesan. Hemu roz ame nejdiye welate pi û kalik û bi Kirmanc.  Raya xo eve dil û can gurete. Dile deyde millete mazlum, sare deyde millete xo caye xo guret. Uşe bi şahin pera şi Kurdistan. Şi welat.

            "O-Hal valisinin açıklamasına göre şanlı ordumuz 25 teröristi barındıkları mağarada ölü ele geçirdi. Ayrıca eşkıyanın gizlendiği Ağrı, Tendürek ve Munzur dağları sürekli bombalanıyor."

            Terorist Uşe bi, Şiyar, Şexo û aye bin bi. Xorte ke hona deste zu çeneke ne gureto, çeneke ke şiya zu xort hona dil ra nekota, merxase mıllete xo bi. Ayeke eve deste çep rehetena Elmanu erzene, ye bi.

            Uşe kotra dismen dime, dismeno ke dewa pi riznayvi, cenu û camerd û mal kerdvi adir. Dismeno ke welat de gem newerdano, Dersim de Serhat u Botan de wesneno. Uşe, Cudi ra Ararat ra û Duzgin ra wenge xo rüsna dina û vat:

Ez kamo?

Ez hêfe Piran, Zilan u Dersim

Roye şehidane Halepçe

Ez terse dile dismen,

Koledariye û bindestiye

Ez hesreta Millete Kurd

Azadiyo, azadi

Ez şahine gile koyan

Ez gerillayo

Sima mi hona nasnekene?

            Uşe cenc bi, semt bi, o ke feteliyene, alvoz vatene: "Maye camerd ardo dina." Deyde ters çinebi, serva azadiya millete xo sond û sodir xebetiya.

Le qersuna bebextu ilam girana. Qersuna xayin tenena jedera. Qersuna Reywer. Uşen ke bi dirvetin virare estera welat. Goniya dey harde welat  kerd cenc. Koye welat tenena sare kerd berz, nika alvoz raya Uşen ra sone, şahine gile koyune.

Haydar Işık, Münih 14.9.95