Daye çira çimê to hen herdisînê

Çeme Munzur hesrînê to ra vejya

To dênerê qorênê xo û berbenê

Dilê to dirvetin derde to giranê 

Pepug wend, ti berba, jarê ma berbay

Biko vînayena Tertelê Dersim kemerê şikitê

Kam na zulüm dît, zerê dey parçe parçeyê

Şare Dersim û êrde Dersim ra gun şiyenê

Aşir qirkerd, lemina dinan koyande feteliyê

Pepug wend, ez berbo, jarê ma berbay

Eskerê Romî ame ma ser hiris û heşt

Dar û bêr bî gêwr û koye Dersim mat

Derdore şare ma û jar bêr guret

Hewrê şa ame Kirmanciye ser vînd biye roşt

Pepug wend, ez berbo, jarê ma berbay

Eskerê Romi qole estê welat ser

Poşta ma çinebî aşir xapeynay

Dest bojiye şare ma gireday

Zalimu tija amnonde sarebirnay

Pepug wend, ez berbo, jarê ma berbay

Bine lingone pî û laj, Kures û Duzgin

Peye Kêwl, Qisle, derê Qil, Kalmem û Gerê

Dayvro makineli wayire pîr û rayver

Kes nêame alikariyê, ti vana jar bî kor û qer

Pepug wend, ez berbo, jarê ma berbay

Ma dînere honde xizmete kerdenê

Çira nevînenê na zulüm na bebexten

Kêrameta xo biya sist, Kures biyo serd

Çira Duzgin top neerzeno ser xayinen

Pepug wend, ez berbo, jarê ma berbay

Biko ti ciziktebiya, Koye Sov gema Alçek

Cêr Kalmem hegaye sur verva Duzgin'e bimbarek,

Uza koli ra gireday, dest lingê cenî û camerd

Benzin kerd ser veşnay bine çimanê êrd û asmen

Pepug wend, ez berbo, jarê ma berbay

Eskere Romi şare ma ra az uz neverda

Munzur gun berdê derya, êrd û hegay bî sur

Naye ki qirkerd xeleşay, roye ma roj be roj merd

Vat: Kirmanciye qediya, şêrê raya Miste kor

Pepug wend, ez berbo, jarê ma berbay

Endi nefetelino Xizir û qal welat bewayir

Şare ma zimane xo caverda, Jarê hereday

Roşta Zerdüşt biye vînd, tariya Romi amey

Tertele roye ma kerd dirvetin bime xizan

Pepug wend, ez berbo, jare ma berbay

04.03.2011

Haydar Isik