Maya mi çimanê xirav ra zaf tersenê û vatene: „Çim ginenêra ci.“ Feqire hen bivî pil, mektev (dibistan) nedivî. Baveriya dinan de hurafe zaf bî. Hen divî, hen bivî, zonayişe xo niyabî. Ez geganê rast amo. E ke şiyenê manga xo, bizane û miyane xo doşenê, mi niyadenê ke bureş biyo pir. Le e ke cirana ma  perskerdene, vatene: „Tove bo merêt biye huşk. Bureş lete nebiyo.“  Cenike bureş nedîyene, çike leçeke xo estene ser. Mi vatene, daye ti çira hen vana, bureş biyo pir? Vatene, biko biko çimê xirav ginenara ci, coka ez hen van. Ti nezonena, zu mordim manga de niyado û cizike manga zaf girs beno. Vano na manga çikas rinda, uza manga qilaşiya hurenda xode merda. Çimê xirav zaf este.

Baveriya şare ma niyabî, le modern dînade qese niyanen de raştiye çina. Kulture feodalitede baveriya skolastik hata Aristo ra  nata ama, ewro ji esta. Kilise xo tene na fikir ra kerd dür, le camiyede her çeşit skolastik berdavam keno. Şare maye Êlevi, raya xo gos ra hesnenê. Pir, laze xora; ey ke çikas hesno, vano laze xora. Ma rind zoneneme ke, eke cor qese ame vatene, cer de ti besenekene ke qeseyayişe cor nasbikerî.

            Çimê xirav kemerê de niyado, kemerê biya hazar perça. Ez sa vaji, mi qese niyanen zaf hesnay.  E ke bavay amenê dewe, la giredene, nusqa viraştene. Nusqa bavay kerdene hîrekose û kincane mara derzenê. Ya ji verva çimane xirav, kemera nezarê kewe kerdenê vile (milê) domanen. Şare ma peyser mendo. Eve hurafe game erzene.

            Çim estê korê, roşta dina tarî vînenê. Le kes besenekeno ke bivajo, roye ninan ji tariyo. Mordimê henen este ke, çime xo korê, le nayeke di çiman ra niyadane, dinan ra rind dina naskenê. Çim este, e ke niyadane vînenê. Çim este niyadane nevînenê. Nika ez ke persbikeri, şare ma niyadano û vîneno ya ki nevîneno? Mira gore eke şare ma ke bivînenê, heta ewro devleta ma ki bîyenê. Dişmen şare ma taride vinderneno, coka şare ma niyadano, le nevîneno. E ke bivînenê vîşt milyon Kurd Tirkiya devlete xo sazkerdene. Şima rind zonene, millete Kurd çevres milyono. Ez van ke çimê na çevres milyon çira tol niyadano. Niyadane, raya xo nevînene. Çim este gemede niyadene, dare nevînenê. Çim este koyu koy, daru dar nevînenê.

            Çim este teyna xiravên dima şone. Çim este şare xore dişmenen kene. Çim este ison ke niyadano zere xo beno hîra. Le çim este ke, mordeme erbavê ke rind vînene, niyadane, hemen naskene û qerar dane, na çim dost nîyanedanê. Dostena na çiman çina. Çime niyanen ra ison besenekeno ke hevalten bikero. Çimê ke serd ayşene, ison dinan ra ji dür vîndeno.

            Çim este rindeke, girse şirine. Çim este kewêye, kesk û şaye. Çim este glorê, çim estê je çaqla ye (çeqla) yani çime her ison ferqliye. Doxtor çimande niyadano, nêweşiye vîneno. Psikolog çimande karaktere ison wendeni. Çim este ison haskeno, çim este ison nefret keno.

             İson gereke rindekana çiman ra ave, çime zere (zare) bizano. Eke çime roye isonde mirdên esta, dosten esta, na çiman ra xayinen yena ya ki nina rind bizano. Le eke çime zere de dürüsten çine bo, deyra daima xayinen yena. Yani çimê zeri çutiriye, çime ke tever de niyadane je dinanê.

Wajime zu kes to de niyadano û le aslê xo inkarkeno. Ya ji dişmene şare xo re dosten keno. Çimê zere dey biye kor. Çike devleta koledar roye dey kerdo şa, keso niyanen de jiyan nêmendo. Çimê zere isone ke wayire (waar) şare xo wejine, zimane xo, kultur û bingeha soziale xo wazene, mordime niyanen de jiyan esto. Çimê niyan dürüste.

www.haydar-isik.com                                                                    15.01.2011